台神畢業生感言

台語字型的下載：
http://taigi.fhl.net/

阮所有的畢業生欲用這个機會，來感謝上帝透過這間學校互阮的恩典。代先阮欲感謝所有的老師，恁攏非常認真教冊，嘛出真濟作業及報告。雖然互阮忝到欲死，但是佇這个中間，阮體會著恁希望透過認真教冊互阮成長的疼心。佇遮阮欲來感謝恁。

閣來阮欲感謝學校所有的職員，恁佇無共款的所在用心迭付出，雖然定定攏無人注意，但是透過恁遮的服事，這間學校才有法度順利來運作，阮才有法度專心來學習。所以佇遮阮欲來感謝恁。

閣來阮欲感謝阮本身的家庭。來神學院讀冊，每一個家庭攏有無共款的犧牲，有無共款的辛苦。但是恁的忍耐及接納，恁的祈禱及陪伴，對阮來講是上大的支持。阮感謝主賞賜恁成做阮的親人。

閣來阮嘛欲感謝所有關心神學教育的兄弟姊妹，無論是透過祈禱、奉獻抑是其他的方式，無論是濟抑是少。上帝使用恁每一個人的參與，互阮佇遮得著造就。阮愛特別來感謝恁。

最後阮嘛欲感謝呼召阮來讀神學院的上帝。若無主的赦免、恩典及引導，阮無可能來服事主，嘛無可能來神學院學習。阮這賣欲畢業，欲開始新个學習，懇求主上帝繼續幫助阮，無論去啥物款的所在，所行所做會當合上帝的心意，互阮會當將學校所學的，無論是社工、協談、音樂抑是神學，攏會當照主的心意來使用，來服事這个時代的人。以上。